زاڵبوون بەسەر ترس و تووڕەییدا
داخستنی درگا کراوەکانی ژیانمان
بە شیمانەیەکی زۆر، زۆربەمان ترسمان تەجروبە کردووە. هەندێک کات ترس یارمەتیدەرە، چونکە لە مەترسییەکەی حەتمی دەتپارێزێت و ڕێگە نادات کوێرانە بکەویتە ناوییەوە. بەڵام کاتی وا هەیە کە لەگەڵ هەبوونی مەترسییەکی کەم یاخود لەگەڵ ئەوەی کە هیچ مەترسییەک بوونی نییە، ئێمە بێ ئەندازە دەترسین. زۆر جار تەنانەت ئەگەر بزانین کە ترسەکە نامەنتقی و نالۆژیکییە یان کاردانەوەیەکی لە ڕادەی خۆی زیاترە، ئینجا ناتوانین خۆمانی لێ بپارێزین.
تووڕەییش بە ئەندازەی ترس دەتوانێت کاریگەری لەسەر ژیانمان دابنێت. لەوانەیە حاڵەت و بارودۆخی وا بێتە پێشمان کە بە هۆیەوە یەکسەر هەڵدەچین و تووڕە دەبین. لەوانەیە هەندێک کات تووڕەبوونەکانمان دروست بێت، هەندێك کاتی دیکەش لەوانەیە زیادەڕەوی تێدا بکەین. ئەوەی کە ڕوویداوە لەوانەیە کێشەیەکی گەورە نەبێت، بەڵام شتیكی دەروونمان بە ئامانج دەگرێت. ئینجا ئەوەی کە لە ناخمانەوە هەڵدەقوڵێت تووڕەییەکی زیاترە کە لە ڕاستیدا تەنها لەو بارودۆخەوە سەرچاوەی نەگرتووە. بۆیە هەتا ئەو کاتەی ئەو تووڕەییە لە ناخماندا بێت، ناوبەناو دێتە دەرەوە.
هەندێك کەس ڕۆژانە ئەم هەستە نامەنتقییانە تەجروبە دەکەن، هەندێكی دیکە زۆر بە دەگمەن. ئەمە ڕێکەوت نییە، بەڵام هۆکارگەلێکی زۆری لە پشتە. بۆ ئەوەی کە بتوانین ڕوونی بکەینەوە کە بەو شێوەیەیە، ئەوا دەبێت نموونەی درگا لە ژیانماندا بەکاربهێنین. وای دابنێ کە ئێمە درگایەکی پڕ لە ترسمان هەیە. کاتێک دەیکەینەوە، ترس دێتە نێو ژیانمانەوە. دەکرێت یەک تۆز لە دەرگاکە بکەینەوە، بەو شێوەیە تەنها یەک تۆز ترس دێتە ژوورەوە. بەڵام دەکرێت بە تەواوی بکرێتەوە و ترسەکە ئەو کەسە بە تەواوی دابپۆشێت و ئیش و کار و بیر و هزری داگیر بکات. بە هەمان شێوە، درگایەکی توڕەییمان لە ژیانماندا هەیە. ئەگەر ئەم درگایانە دابخرێن، هیچ ترس و تووڕەییەکی ناتەندروست ناتوانێت بێتە نێو ژیانمانەوە. وەکو چۆن خۆمان دەتوانین ئەو درگایانە بکەینەوە، خەڵکیش دەتوانێت بیانکاتەوە. بە گشتی لە کاتی گەنجێتیدا یەکەم درگا لە لایەن کەسێکی دیکە دەکرێتەوە کە کاریگەری لەسەر ژیانمان دروست کردووە، وەکو دایک و باوکمان. دواتر، خۆمان درگاکەمان زیاتر کردووەتەوە.
هەواڵە خۆشەکە ئەوەیە کە دەکرێت دیسان ئەم درگایانە دابخەینەوە. خودا نایەوێت کە ئێمە بکەوینە ژێر کاریگەری هێزی خراپەی ترس و تووڕەییەوە، بەڵکو دەیەوێت ئازاد بین.
درگاری ترس و تووڕەیی
|
درگای ترس |
درگای توڕەیی | |
|---|---|---|
| نیشانە چاوەڕوانکراوەکان کاتێک درگاکە دەکرێتەوە |
|
|
| شێوازی هەڵە | هەوڵدان بۆ خۆپاراستن | هەوڵدان بۆ بیانووهێناوە |
| ڕاستیی | خودا دەیەوێت بمانپارێزێت | خودا دەیەوێت بەرگریمان لێبکات و دادوەریی جێبەجێ بکات |
چۆن درگایەکی کراوە دابخەین
خودا هەرگیز نایەوێت کە ترس و تووڕەیی بەسەرماندا زاڵ بێت. کاتێک ئەم جیهانەی دروست کرد، هەموو شتێک تەواو و کامڵ بوو. ترس و ئازار و مردن و نادادپەروەری بوونی نەبوو. بەداخەوە، یەکەم مرۆڤ و ئێمەش، دژی خودا یاخی بووین و لە جێگەی چاکەی خودا خراپەمان هەڵبژارد. دەرەنجامی ئەمە بریتییە لە دنیایەکی ڕووخاو و وێران، کە شەیتان دەور و ڕۆڵێکی زۆری تێدا هەیە. شەیتان بەردەوام لە هەوڵی ئەوەدایە کە دەست بەسەر خەڵکدا بگرێت و ئەم درگا کراوانە بەکاردێنێت بۆ ئەوەی مرۆڤەکان بکاتە کۆیلەی ترس و تووڕەییەکی ناتەندروست.
درگاکان لە ڕێگەی گوناهەوە کراونەتەوە، جا ئیدی گوناهی ئێمە بێت یان هی کەسانی دیکە. گوناه دەسەڵات بە شەیتان دەدات کە کاریگەری لەسەر ژیانمان هەبێت. هەروەها، وا دەکات کە کەم کەم باوەڕ بە درۆ بکەین. ئەم درۆیانە دەبنە هۆی ئەوەی کە درگاکان بە کراوەیی بمێننەوە. چەند نموونەیەک:
- باوکت بەهۆی کارێکەوە لێت تووڕە بووە و بە هیچ شێوەیەک گوێی لێ نەگرتی. تۆش بەهۆی ئەو کارە هەڵەوە تووڕە دەبیت و پێت وایە کە هەتا لە پێناو مافەکانتدا شەڕ نەکەیت، بەباشی و دادپەروەرانە هەڵسوکەوتت لەگەڵ ناکرێت.
- مامۆستاکەت لەبەردەم قوتابییەکانی دیکەدا سووکایەتی پێ کردی. ئێستا تۆ دەترسی کە لە پۆلدا قسە بکەیت، چونکە پێتوایە کە قوتابییەکی زیرەک نیت.
خودا بەڵێنی چارەسەری کێشەی گوناه و ڕووخاوی و وێرانی جیهانی داوە. ڕێک لە دوای یەکەم گوناهی مرۆڤایەتییەوە، بەڵێنی هاتنی ڕزگارکاری دا کە سەری شەیتان پان دەکاتەوە (پەیدابوون ٣: ١٥). ئەو ڕزگارکارە عیسایە، کە مەسیحەکەیە. عیسا تاکە کەسێك بوو کە لەسەر زەوی گوناهی نەکرد. هەر لەبەر ئەوەش شەیتان هیچ دەسەڵاتێکی بەسەردا نەبوو. عیسا لە لایەن خەڵکەوە کوژرا، بەڵام لە دوای سێ ڕۆژ زیندوو بووەوە. بەو شێوەیە، خودا ئەو پەیامەی پشتڕاست کردەوە کە عیسا شەیتانی بەزاندووە! هەر کەسێک باوەڕی بە عیسا هەبێت، ئەوا لە ژێر دەسەڵاتی شەیتاندا ڕزگاری دەبێت. لەبەر ئەوەی عیسا ئەو کەسەیە کە دەتوانێت ئازادمان بکات، دەورێکی سەرەکی و بنەڕەتی دەگێڕێت لە داخستنی درگا کراوەکاندا. عیسا لە (یۆحەنا ٨: ٣١- ٣١)دا دەفەرموێت: "ئه‌گه‌ر له‌سه‌ر فێركردنه‌كانم بمێننه‌وه، ئه‌وا به‌ڕاستی قوتابی منن و ڕاستی ده‌ناسن، ڕاستیش ئازادتان ده‌كات."
سێ ئایەتی گرنگ لەسەر دوو درگاکە
كاتێك تووڕه ده‌بن، گوناه مه‌كه‌ن. مه‌هێڵن ڕۆژ ئاوا بێت به‌سه‌ر تووڕه‌ییتاندا، ده‌رفه‌ت بۆ شه‌یتان مه‌ڕه‌خسێنن. (ئەفەسۆس ٤: ٢٦- ٢٧)
چونكه خودا ڕۆحی ترسی پێمان نه‌به‌خشیوه، به‌ڵكو ڕۆحی هێز و خۆشه‌ویستی و خۆڕاگریی پێ به‌خشیوین. (دووەم تیمۆساوس ١: ٧)
چونكه یه‌زدان ڕۆحه‌كه‌یه، هه‌روه‌ها ڕۆحی یه‌زدان له‌كوێ بێت، ئازادی له‌وێیه. (دووەم کۆرنسۆس ٣: ١٧)
پڕۆسەی داخستنی درگاکان
زۆر جار شتی جیاواز هەن کە وا دەکەن ئەم درگایانە لە ژیانماندا کراوە بن. خودا دەیەوێت کە هەموو ئەو درگایانە دابخات و زۆر بە باشی دەزانێت کە دەبێت لە کوێوە دەست پێ بکات. بە داواکردنی ڕاستەوخۆ لە خودا، دەرفەتی ئەوەی پێ دەدەین کە بە تایبەتی قسەمان لەگەڵ بکات. پڕۆسەکە بە پرسیارکردن لەو دەست پێدەکات، ئینجا ئەو شتێکمان بۆ دەردەخات، بە گشتی بارودۆخێكی تایبەت کە لەوێدا درگایەک لە ژیانماندا کراوەتەوە. بە یارمەتی عیسا، هەموو ئەو کاریگەرییە نەرێنییانە لەناودەبەین کە بەهۆی ئەو بارودۆخەوە سەرچاوەی گرتووە.
خودا بە گشتی هەموو شتەکان پێکەوە ئاشکرا ناکات، چونکە بۆ ئێمە زۆر دەبێت و تووشی بارگرانی دەبین. بۆیە، دەیەوێت هانمان بدات و هەنگاو بە هەنگاو لەو پڕۆسەیەدا لەگەڵمان بێت.
ڕێنمایی کردەیی
سوود لە یارمەتی کەسێکی باش وەربگرە! تکایە ڕاستەوخۆ پێمان بڵێ ئەگەر پێت وایە کە فشارت لەسەرە یان بە جۆرێک ناتوانیت بەباشی ئەنجامی بدەیت! ئەگەر ئامادەی کە لەگەڵ خودا بکەویتە گفتوگۆ، ئەوا دەتوانیت دەستپێبکەیت:
ئەی ڕۆحی خودا دەتەوێت بەرەو کام درگا ڕێنماییم بکەیت؟ عیسای مەسیح تکایە بمپارێزە کاتێک بەرەو ئەو درگایە دەڕۆم.
کەی بۆ یەکەم جار ئەو درگا کرایەوە؟ کێ کردیەوە؟
- ڕێگە بە خودا بدە کە نیشانت بدات چی ڕوویدا؟ ئەگەر درگاکە لەلایەن کەسێكی دیکەوە کراوەتەوە، ئەوا بیبەخشە بەهۆی ئەو کارەی کە کردوویەتی و بۆ ئەو درگایەی لە ژیانتدا کردووەتەوە. بۆ زانیاری زیاتر لەسەر لێخۆشبوون، تکایە بڕوانە "لێخۆشبوونی هەنگاو بە هەنگاو". ئەگەر خۆشت ئەو درگایەت کردووەتەوە، ئەوا داوای لێخۆشبوون لە خودا بکە و ئینجا تۆبە بکە.
من باوەڕم بە چ درۆیەک هەیە کە درگاکەی بە کراوەیی هێشتووەتەوە؟
- ئەی یەزدان، داوای لێبوردن دەکەم کە هاوکاری ئەو درۆیەم کردووە، تکایە لێم خۆشبە. ئەو درۆیە ڕەتدەکەمەوە کە .......
عیسای مەسیح تکایە ڕاستییەکەم پێ بڵێ.
- بە دەنگی بەرز ڕاستییەکە بڵێ و پاشان قبوڵی بکە.
سەرنج بدەوە: عیسای مەسیح، ئێستا درگاکە چۆنە؟ دەکرێت بێزەحمەت دایبخەیت؟
- ئەگەر ئێستا بەتەواوی دانەخرێت، داوای لە عیسا بکە کە لەنێو درگاکەدا ڕابوەستێت بۆ ئەوەی نەتوانین درگاکە بەکاریبێنین.
